നിങ്ബോ (ചൈന): ബാഡ്മിന്റണ് ഏഷ്യ ചാമ്പ്യന്ഷിപ്പ് പുരുഷ സിംഗിള്സില് ഇന്ത്യയുടെ യുവതാരം ആയുഷ് ഷെട്ടിയുടെ അട്ടിമറി മുന്നേറ്റം.
ഇന്ത്യയുടെ ഭാവിതാരമായി വിശേഷിപ്പിക്കപ്പെടുന്ന 20കാരനായ ആയുഷ് ഷെട്ടി, ലോക ഏഴാം നമ്പര് താരമായ ചൈനയുടെ ലി ഷി ഫെങിനെ അട്ടിമറിച്ച് പ്രീക്വാര്ട്ടറില് പ്രവേശിച്ചു. 2025 ഹോങ്കോംഗ് ഓപ്പണ് ചാമ്പ്യന്കൂടിയായ ലി ഷി ഫെങിനെ നേരിട്ടുള്ള സെറ്റിനായിരുന്നു ആയുഷ് കീഴടക്കിയത്. സ്കോര്: 21-13, 21-16. തായ്വാന്റെ ചി യു ജീനാണ് പ്രീക്വാര്ട്ടറില് ആയുഷിന്റെ എതിരാളി.
പ്രണോയ്, സിന്ധു
പുരുഷ സിംഗിള്സില് മലയാളി താരം എച്ച്.എസ്. പ്രണോയ് പ്രീക്വാര്ട്ടറില് പ്രവേശിച്ചു. വിയറ്റ്നാമിന്റെ നുയെന് ഹായ് ഡാങിനെ 47 മിനിറ്റ് നീണ്ട പോരാട്ടത്തില് 24-22, 21-12ന് പ്രണോയ് കീഴടക്കി. ജനുവരിയില് ഇന്ത്യ ഓപ്പണിനുശേഷം പ്രണോയിയുടെ ആദ്യ ജയമാണ്. പ്രീക്വാര്ട്ടറില് ചൈനയുടെ വെങ് ഹോങ് യാങാണ് മലയാളി താരത്തിന്റെ എതിരാളി.
വനിതാ സിംഗിള്സില് പി.വി. സിന്ധുവും പ്രീക്വാര്ട്ടറില് ഇടംനേടി. പരിക്കിനെത്തുടര്ന്ന് രണ്ട് മാസത്തില് അധികം പുറത്തിരുന്ന സിന്ധു, പിന്നില്നിന്നെത്തിയാണ് ജയം നേടിയത്. മലേഷ്യയുടെ ലോക 38-ാം നമ്പര് താരമായ വോങ് ലിന് ചിങിനെ 15-21, 21-11, 21-19ന് സിന്ധു തോല്പ്പിച്ചു. പ്രീക്വാര്ട്ടറില് ചൈനയുടെ രണ്ടാം സീഡായ വാങ് ഹി യി ആണ് സിന്ധുവിന്റെ എതിരാളി.
അതേസമയം, പുരുഷ സിംഗിള്സില് ഇന്ത്യയുടെ ലക്ഷ്യ സെന്നും കിഡംബി ശ്രീകാന്തും ആദ്യ റൗണ്ടില് പുറത്തായി. ഹോങ്കോംഗിന്റെ ലീ ച്യൂക് യുവിനോടായിരുന്നു ലക്ഷ്യയുടെ തോല്വി. സ്കോര്: 12-21, 19-21. സിംഗപ്പുരിന്റെ ലോഹ് കീന് യൂവാണ് ശ്രീകാന്തിനെ കീഴടക്കിയത്. സ്കോര്: 21-18, 9-21, 11-21.
Deepika
E-paper LOGIN
LOGIN
